2029 ఎన్నికలకు పవన్ లెక్కేంటి?.. జనసేన బలమెంత?

2029 ఎన్నికలకు పవన్ లెక్కేంటి?..

పవన్ కళ్యాణ్ 2019లో రెండు చోట్ల పోటీ చేశారు. రెండుచోట్లా ఓడిపోయారు.

జనసేన పార్టీ 137 స్థానాల్లో పోటీ చేస్తే.. గెలిచింది ఒక్కటే.

ఐదేళ్లు గడిచాయి..

2024లో 21 అసెంబ్లీ స్థానాల్లో పోటీ చేశారు. 21 చోట్లా గెలిచారు.

రెండు లోక్‌సభ స్థానాల్లో పోటీ చేస్తే.. రెండూ జనసేన ఖాతాలోనే పడ్డాయి.

రాజకీయాల్లో ఐదేళ్లలో ఇలాంటి మార్పు చాలా అరుదు….

ఒకప్పుడు తాను పోటీ చేసిన రెండు చోట్లా ఓడిపోయిన నాయకుడు.. ఐదేళ్ల తర్వాత రాష్ట్రానికి ఉప ముఖ్యమంత్రి అయ్యారు.

ఒకప్పుడు అసెంబ్లీలో ఒకే ఒక్క సీటు ఉన్న పార్టీ.. ఇప్పుడు అధికారంలో కీలక భాగస్వామిగా మారింది.

కథ ఇక్కడితో ముగిసిందా?అంటే లేదు….నిజానికి అసలు కథ ఇప్పుడే మొదలైంది.గడిచిన పదేళ్ళు చాలా ఒడిదుడుకులు ఎదుర్కొన్న జనసేనకు అత్యంత కీలకం 2029 ఎన్నికలు…ఒక రకంగా చావో రేవో అన్న పరిస్థితి.

జనసేన బలమెంత..?

2024లో కూటమి విజయానికి కీలక శక్తిగా నిలిచిన పవన్.. 2029లోనూ అదే పాత్రలో ఉంటారా?

లేక జనసేన రాజకీయ పరిధిని మరింత విస్తరిస్తారా?

21 సీట్ల నుంచి మరింత పెద్ద వాటా కోరుతారా?

అసలు జనసేనకు సొంత ఓటు బలం ఎంత?

21కి 21 విజయాల్లో పవన్ వ్యక్తిగత ప్రభావం ఎంత? జనసేన ఓటు ఎంత? కూటమి ఓట్ల బదిలీ ఎంత?

ఈ ప్రశ్నలకు సమాధానాలు అభిమానుల నినాదాల్లో దొరకవు.ప్రత్యర్థుల విమర్శల్లోనూ దొరకవు.ఎన్నికల లెక్కల్లో వెతకాలి.ఎందుకంటే పవన్ కళ్యాణ్ 2029 వ్యూహం అర్థం కావాలంటే.. ముందుగా జనసేన ఎక్కడి నుంచి వచ్చింది, ఇప్పుడు ఎక్కడ నిలిచింది, ఇంకా ఎంత దూరం వెళ్లగలదో అంచనా వేయాలి.2019 ఓటమిని పరిశీలిస్తే ..ఆ లెక్కలో ఒక సంకేతం ఉంది..2019 ఎన్నికలు జనసేనకు చేదు అనుభవాన్ని మిగిల్చాయి.137 అసెంబ్లీ స్థానాల్లో పోటీ చేసిన జనసేన గెలిచింది ఒక్క రాజోలు మాత్రమే.పవన్ కళ్యాణ్ స్వయంగా భీమవరం, గాజువాక నుంచి పోటీ చేసి రెండుచోట్లా ఓడిపోయారు.2019లో రాష్ట్రవ్యాప్తంగా జనసేనకు వచ్చిన ఓట్లు 5.53 శాతం.ఈ సంఖ్యను చిన్నదిగా కనపడొచ్చు.కానీ ఇక్కడ ఒక విషయం గుర్తించాలి.ఒక కొత్త పార్టీ..బలమైన గ్రామస్థాయి వ్యవస్థ లేకుండా, రాష్ట్రంలోని రెండు ప్రధాన పార్టీల మధ్య జరిగిన తీవ్ర పోరులో జనసేన 17 లక్షలకు పైగా ఓట్లు సాధించింది.అంటే 2019 ఇచ్చిన తీర్పు..జనసేనకు ఓటు లేదు అని కాదు.ఉన్న ఓటును గెలుపుగా మార్చే రాజకీయ సమీకరణం లేదు అని గణాంకాలను చూస్తే అర్థమవుతుంది.
ఇక్కడ మూడు విషయాలను నిశితంగా పరిశీలిస్తే..ఒకటి..సభలకు జనం రావడం..వారిని ఓటర్లుగా మార్చడం మరొకటి.వచ్చిన ఓట్లను సీట్లుగా మార్చడం ఇంకొకటి.ఈ మూడింటిలో 2019లో పవన్‌కు మొదటి రెండు కొంతవరకు కనిపించాయి.మూడోది కనిపించలేదు.ఇక్కడే పవన్ రాజకీయ ప్రయాణంలో అతిపెద్ద మలుపు మొదలైందని చెప్పవచ్చు.

2024లో పవన్ మార్చింది పార్టీని మాత్రమే కాదు.. లెక్కను కూడా!

2019లో జనసేన 137 స్థానాల్లో పోటీ చేసింది.

2024లో కేవలం 21 స్థానాల్లో బరిలో నిలిచింది.

చూస్తే ఇది వెనకడుగులా కనిపించవచ్చు.

కానీ ఫలితం చూస్తే..

21కి 21.

2019లో ప్రశ్న—

“ఎన్ని చోట్ల పోటీ చేస్తున్నాం?”

2024లో ప్రశ్న మారింది.

“ఎక్కడ పోటీ చేస్తే గెలవగలం?”

ఈ రెండు ప్రశ్నల మధ్యే జనసేన ఐదేళ్ల రాజకీయ ప్రయాణం దాగి ఉంది.

2019లో జనసేన తన ఉనికిని చూపించడానికి ప్రయత్నించింది.

2024లో అధికారాన్ని చేరుకోవడానికి వ్యూహం మార్చింది.

ఫలితం కూడా మారింది.

రాష్ట్రవ్యాప్తంగా జనసేనకు 2024లో 23 లక్షలకు పైగా ఓట్లు వచ్చాయి. ఓట్ల వాటా 6.87 శాతం.కానీ ఇక్కడే ఒక ఆసక్తికరమైన సమస్య ఉంది.2019లో 137 స్థానాల్లో పోటీ చేసిన పార్టీకి 5.53 శాతం ఓట్లు వచ్చాయి.2024లో 21 స్థానాల్లో మాత్రమే పోటీ చేసిన పార్టీకి రాష్ట్రవ్యాప్తంగా 6.87 శాతం ఓట్లు వచ్చాయి.అయితే..ఈ రెండు సంఖ్యలను నేరుగా పోల్చడం సరైన పద్ధతి కాదు.ఎందుకంటే 2024లో మిగిలిన 154 స్థానాల్లో జనసేన అభ్యర్థులే లేరు.

మరి అక్కడ జనసేన మద్దతుదారుల ఓట్లు ఎటు వెళ్లాయి?

టీడీపీకి ఎంత మేర బదిలీ అయ్యాయి?

బీజేపీ అభ్యర్థులకు ఎంత మేర చేరాయి?

ఇక్కడి నుంచే జనసేన అసలు బలం చుట్టూ ఉన్న రాజకీయ మిస్టరీ మొదలవుతుంది.

21 విజయాలు.. పవన్ బలమా? కూటమి బలమా?

ఈ ప్రశ్నకు రెండు సులభమైన సమాధానాలు ఉన్నాయి.

జనసేన మద్దతుదారుల సమాధానం—

“ఇది పవన్ బలం.”

ప్రత్యర్థుల సమాధానం—

“టీడీపీ ఓట్లు లేకపోతే సాధ్యమయ్యేది కాదు.”

కానీ ఎన్నికల ఫలితాలను ఇంత సులభంగా విడదీయడం సాధ్యం కాదు.2024లో టీడీపీ, జనసేన, బీజేపీ కూటమి మొత్తం 55.30 శాతం ఓట్లు సాధించింది.175 స్థానాల్లో 164 గెలిచింది.టీడీపీ 135…జనసేన 21..బీజేపీ 8…ఇంతటి విజయం రావాలంటే నాయకులు చేతులు కలపడం మాత్రమే సరిపోదు.ఓటర్లు కూడా చేతులు కలపాలి.జనసేన పోటీ చేసిన చోట టీడీపీ ఓటరు జనసేన గుర్తుకు ఓటు వేయాలి.టీడీపీ పోటీ చేసిన చోట జనసేన మద్దతుదారు టీడీపీకి ఓటు వేయాలి.బీజేపీ అభ్యర్థికి కూడా మిత్రపక్షాల ఓటు చేరాలి.అంటే 2024లో జరిగింది కేవలం సీట్ల సర్దుబాటు కాదు.విస్తృత స్థాయిలో ఓట్ల సమీకరణ.అందుకే “జనసేన గెలిచింది టీడీపీ వల్ల మాత్రమే” అనే వాదన ఎంత అసంపూర్ణమో..“21 విజయాలు పూర్తిగా జనసేన సొంత బలమే” అనే వాదన కూడా అంతే అసంపూర్ణం.

కానీ..ఇక్కడ నిజమైన ప్రశ్న వేరే..

ఈ కూటమి విజయ సూత్రంలో జనసేన తీసుకువచ్చిన అదనపు ఓటు ఎంత?

ఈ ప్రశ్నే 2029 రాజకీయాల్లో పవన్ విలువను నిర్ణయించవచ్చు.

6.87 శాతం ఓటే జనసేన పూర్తి బలమా?

ఇదే ఇక్కడ అత్యంత ఆసక్తికరమైన ప్రశ్న..

2024లో జనసేన రాష్ట్రవ్యాప్త ఓట్ల వాటా 6.87 శాతం.అయితే దీన్ని చూసి జనసేన బలం అంతే అని చెప్పలేం.అలాగే అంతకంటే చాలా ఎక్కువ ఉందని కూడా స్పష్టంగా చెప్పలేని పరిస్థితి.పార్టీ పోటీ చేసింది కేవలం 21 స్థానాల్లో మాత్రమే.మిగిలిన 154 స్థానాల్లో జనసేన మద్దతుదారులు కూటమి అభ్యర్థులకు ఓటు వేసి ఉంటే.. ఆ ఓటు అధికారిక ఫలితాల్లో టీడీపీ లేదా బీజేపీ ఖాతాలో కనిపిస్తుంది.అంటే జనసేనకు ఉన్న స్వతంత్ర ఓటు పునాదిని 2024 రాష్ట్రవ్యాప్త ఓట్ల శాతం ఒక్కటితో కొలవడం కరెక్ట్ కాదు.జనసేన అసలు బలం తెలుసుకోవాలంటే కొన్ని ప్రశ్నలకు సమాధానం వెతకాలి.

2019లో జనసేన ఓటు ఏ ప్రాంతాల్లో ఎక్కువగా కేంద్రీకృతమైంది?

2024లో జనసేన పోటీ చేసిన స్థానాల్లో విజయ తేడాలు ఎలా ఉన్నాయి?

జనసేన ప్రభావం ఉందని భావించే ప్రాంతాల్లో టీడీపీ అభ్యర్థుల ఓట్లు ఎంత పెరిగాయి?

ఈ ఓటు ఒక ఎన్నికలో కూటమి కోసం జరిగిన సమీకరణమా?

లేక దీర్ఘకాల రాజకీయ బంధంగా మారుతోందా?

2029 కథ ఈ ప్రశ్నల చుట్టూనే తిరగవచ్చు.

2019లో రెండు చోట్ల ఓడిపోయిన పవన్ కళ్యాణ్..2024లో పిఠాపురంలో 70 వేలకుపైగా మెజారిటీతో గెలిచారు.ఇది కేవలం ఒక నియోజకవర్గ విజయం అనడం సరి కాదు.ఇది పవన్ రాజకీయ జీవితంలో ఒక మానసిక అడ్డంకిని తొలగించిన విజయం.

2019 తర్వాత ప్రత్యర్థులు పదేపదే అడిగిన ప్రశ్న—

“సభలకు వచ్చే జనాన్ని ఓట్లుగా మార్చగలరా?”

2024 ఆ ప్రశ్నకు సమాధానం ఇచ్చింది.

అయితే ఇప్పుడు మరో ప్రశ్న ఎదురుగా ఉంది.

అది ఇంకా కఠినమైనది.

పవన్ కళ్యాణ్ ప్రత్యక్ష ప్రభావం లేకుండా కూడా జనసేన అభ్యర్థి గెలవగలడా?

ఇదే ఒక నాయకుడి ప్రజాదరణకు, ఒక పార్టీ సంస్థాగత బలానికి మధ్య ఉన్న తేడా.నాయకుడు ఒక పార్టీకి తలుపులు తెరవగలడు.కానీ గ్రామస్థాయి నాయకత్వం, కార్యకర్తల వ్యవస్థ, స్థానిక సమస్యలపై పోరాటం, బలమైన అభ్యర్థులు మాత్రమే పార్టీని దీర్ఘకాలం నిలబెడతాయి.2024లో పవన్ తన నాయకత్వాన్ని కొంత నిరూపించుకున్నారు.అయితే..2029 నాటికి నిరూపించాల్సింది ఇంకా ఉంది.జనసేన అనే వ్యవస్థను పూర్తిగా బలోపేతం చేయలాంటే….పవన్ కళ్యాణ్ ముందు ఇప్పుడు మూడు రాజకీయ దారులు ఉన్నాయి.2029ఎన్నికలకు కొంత సమయం ఉంది.కానీ ప్రస్తుతం ఉన్న రాజకీయ లెక్కలను బట్టి పవన్ ముందు మూడు ప్రధాన దారులు కనిపిస్తున్నాయి.

ఒకటి: అదే కూటమి.. పెరిగిన రాజకీయ వాటా

2024 సూత్రం విజయవంతమైంది.

కాబట్టి కూటమి కొనసాగడం రాజకీయంగా అత్యంత సహజమైన దారి.

కానీ 2029లోనూ జనసేన 21 స్థానాలకే పరిమితం అవుతుందా?లేక 100 శాతం విజయాన్ని చూపిస్తూ ఎక్కువ స్థానాలు కోరుతుందా? అంటే..
ఇక్కడ ఒక విషయం గుర్తించాలి.రాజకీయాల్లో సీట్ల వాటా గత విజయంతో మాత్రమే నిర్ణయించబడదు.భవిష్యత్‌లో ఎన్ని స్థానాల్లో గెలవగలమని నిరూపించగలమన్నదే అసలు బలం.
అందుకే రాబోయే కాలంలో జనసేన విస్తరణే 2029 సీట్ల చర్చకు పునాది కావచ్చు.

కూటమిలో ఉంటూనే సొంత పార్టీ విస్తరణ…

పవన్‌కు ఇది అత్యంత కీలకమైన దారి.అధికారంలో భాగస్వామిగా కొనసాగడం.అదే సమయంలో పార్టీని గ్రామస్థాయిలో విస్తరించడం.21 మంది ఎమ్మెల్యేలను కేవలం ప్రజాప్రతినిధులుగా కాకుండా.. పార్టీ విస్తరణకు కేంద్రాలుగా మార్చడం.రెండోస్థాయి నాయకత్వాన్ని తయారు చేయడం.యువతను సోషల్ మీడియా మద్దతుదారుల నుంచి క్షేత్రస్థాయి కార్యకర్తలుగా మార్చడం.కొన్ని ప్రాంతాల్లో ఉన్న జన‌సేన ప్రభావాన్ని రాష్ట్రంలోని ఇతర ప్రాంతాలకు తీసుకెళ్లడం.ఇదే జరిగితే 2029లో జనసేన రాజకీయ విలువ పూర్తిగా మారవచ్చు.పవన్ కళ్యాణ్ బలం నుంచి జనసేనను బలంగా మార్చడం.ఇదే పవన్ కళ్యాణ్‌కు అత్యంత కఠినమైన దారి అని చెప్పాలి.ప్రస్తుత పరిస్థితుల్లో జనసేన రాజకీయ గుర్తింపులో పవన్ కళ్యాణ్ పాత్ర అత్యంత పెద్దది.అది పార్టీకి బలం. అయితే ఇక్కడే ఓ సమస్య ఉంది.ఎందుకంటే ఒక పార్టీ దీర్ఘకాలం నిలవాలంటే నాయకుడితో పాటు రెండోస్థాయి నాయకులు కనిపించాలి.ప్రజలు పార్టీకి చెందిన ఐదుగురు, పది మంది నాయకులను గుర్తించగలగాలి.స్థానిక సమస్య వచ్చినప్పుడు పార్టీ అధ్యక్షుడు వచ్చే వరకు ఎదురుచూడకుండా స్థానిక నాయకత్వం స్పందించాలి.2029 నాటికి జనసేన ఈ మార్పును ఎంతవరకు సాధిస్తుందన్నదే దాని అసలు రాజకీయ పరీక్ష.

2029లో జగన్‌కు.. పవన్ ఎంత పెద్ద సమస్య?

2024కు ముందు ఏపీ రాజకీయాలను ప్రధానంగా రెండు శక్తుల పోటీగా చూసేవారు.టీడీపీvsవైసీపీ…ఎందుకంటే జనసేనకు ఓట్లు ఉన్నా.. సీట్లు లేవు.ఇప్పుడు పరిస్థితి మారింది.జనసేనకు 21 మంది ఎమ్మెల్యేలు ఉన్నారు.ప్రభుత్వంలో భాగస్వామ్యం ఉంది.పవన్ కళ్యాణ్‌కు పరిపాలనా అనుభవాన్ని కూడబెట్టుకునే అవకాశం వచ్చింది.ఇదే ఇపుడు వైసీపీకి కొత్త రాజకీయ సవాల్.ఎందుకంటే 2029లో జగన్‌కు ఎదురుగా కేవలం చంద్రబాబు నాయకత్వంలోని టీడీపీ మాత్రమే ఉండకపోవచ్చు.అధికార అనుభవం కూడబెట్టుకున్న పవన్ కళ్యాణ్ కూడా కూటమిలో కీలక ప్రచార శక్తిగా ఉండవచ్చు.అయితే ఇక్కడ పవన్‌కు కూడా ప్రమాదం ఉంది.ప్రశ్నించే నాయకుడిగా ఉండటం సులభం.ప్రభుత్వంలో భాగస్వామిగా ఉండి ప్రజల అంచనాలను అందుకోవడం కష్టం.ఎందుకంటే..2029లో ప్రజలు పవన్‌ను కేవలం సినీ నటుడిగానో.. ఉద్యమ నాయకుడిగానో చూడరు.పాలనలో భాగస్వామిగా చూస్తారు.అదే పవన్‌కు అతిపెద్ద అవకాశం.అదే అతిపెద్ద పరీక్ష కూడా.

2029లో అసలు లెక్క సీట్లది కాదు..!

ఇప్పుడు రాజకీయ చర్చల్లో ఒక ప్రశ్న ఎక్కువగా వినిపించవచ్చు.2029లో జనసేన ఎన్ని సీట్లు అడుగుతుంది అని.కానీ ఈ ప్రశ్న ఇప్పటికి అంత ముఖ్యమైనది కాదు.అసలు ప్రశ్న..
2029 నాటికి జనసేన ఎన్ని స్థానాల్లో నిజంగా గెలవగల పార్టీగా తయారవుతుంది అన్నదే అసలు ప్రశ్న.ఎందుకంటే సీట్లు అడగడం ఈజీనే.కానీగెలిచే శక్తిని నిర్మించడమే అసలైన సవాల్.2019లో జనసేనకు ప్రజాదరణ ఉంది.కానీ విజయానికి అవసరమైన సమీకరణం లేదు.2024లో సమీకరణం దొరికింది.విజయం వచ్చింది.అధికారం వచ్చింది.ఓకే..కానీ
ఇప్పుడు 2029కు ముందు చేయాల్సిన పని ఒక్కటే.విజయాన్ని వ్యవస్థగా మార్చడం.

చివరగా..

2019 పవన్‌కు ఒక పాఠం నేర్పింది.

ప్రజాదరణ ఒక్కటే అధికారాన్ని ఇవ్వదు అని

2024 మరో విషయం నిరూపించింది.

అదే సరైన వ్యూహం ప్రజాదరణను విజయంగా మార్చగలదు అని..

ఇప్పుడు 2029 మూడో ప్రశ్నకు సమాధానం చెప్పాలి.ఒక ఎన్నికలో వచ్చిన విజయాన్ని శాశ్వత రాజకీయ శక్తిగా మార్చగలరా అని.2024లో పవన్ కళ్యాణ్ తన రాజకీయ బలాన్ని చూపించారు.2029 నాటికి జనసేన పార్టీ బలాన్ని చూపించాల్సి ఉంది.ఎందుకంటే..2024లో పవన్ గెలిచారు.అది ఇపుడు గతం…కానీ 2029 జనసేనకు అసలు పరీక్ష.
ఆ పరీక్ష ఫలితమే పవన్ కళ్యాణ్ భవిష్యత్ రాజకీయ లెక్కను నిర్ణయించవచ్చు.అందుకు పవన్ కళ్యాణ్ ఎలా ముందు వెళ్తాడు అన్నదే రాబోయే రోజుల్లో అత్యంత కీలకం